اكتساب وقت ام جنون؟

الموضوع في بالي من زمان
وكل ما جيت اكتب عنه انشغل بموضوع ثاني

كلنا نحتاج للوقت حتى نخلص اشغالنا واعمالنا اللي ما تنتهي
“يخلص العمر والشغل ما يخلص”
ومن ضمن الأمور اللي نحاول نكسب الوقت فيها
اختصار المشاوير بالسيارة
يا اما نبحث عن طريق مختصر او قليل الازدحام
او عن طريق

“زيادة السرعة”

وهو الحل اللي الأغلبية يلجأ له
خلال الاسبوعين الماضين كثرت مشاويري للمستشفى
بسبب نزلات البردة، كل يومين او ثلاثة شخص منا يضطر يروح
عند التقاطع، كنت اراقب حركة السير عند كل اشارة
بصراحه تعجبت من الوضع، ومن سرعة بعض الاشخاص
بدون مبالغة، شفت سيارة تعدي التقاطع في ثانية ! بلمح البصر
بس عشان ما يوقف ينتظر كم دقيقة !! معقوله

والموقف الثاني وهو اللي أثر فيني أكثر من غيره
كنا راجعين عن طريق شارع الملك عبدالعزيز، التفت يميني واشوف طفل عمره ما يتجاوز 9 أشهر
جالس بحضن أبوه وهو يسوق !! ولكم تتخيلون كيف كانت الناس تسوق بهذاك الشارع
اللي بالرغم من ازدحامه، يزيدون من سرعتهم عشان “الإشارة” ما تمسكهم
وكان الأب مسرع، انا استغربت ان الأم تاركه طفلها اللي ما كمل سنه بحضن أبوه
ما عندها احساس؟ ما تخاف على طفلها يعني؟
لو قدر الله وصار لهم حادث، هل بتلوم نفسها على اهمالها؟

والموااااااقف اللي اشوفها اكثر شي
خصوصاً لما اروح للبحر “العزيزية” ، هناك اشوف كل شي
ابسطها، الطفل مطلع راسه من الشباك
لما يكون الشباك مفتوح كله ما اهتم كثير، لكن لما يكون مفتوح نص
لأن صار ان احد الاطفال بنفسه رفع الشباك على رقبته
داس على الزر وارتفع الشباك !! عشان كذا اقول مفتوح كله اهون

والا ان بعضهم يتركهم يجلسون
يفتحون الشباك ويجلسون !! صاحيين؟

من كثر اللي اشوفه ما اتذكرها كلها
هذا اقرب شي على بالي لأني شفته بالفترة الأخيره

للي يسرعون، فكروا قبل لا تزيدون من السرعة
السرعة ما راح تقربكم من مواعيدكم واعمالكم، بالعكس يمكن تأخركم أكثر
لللآباء، لا تهملون اطفالكم وتتركونهم يلعبون بالسيارة كأنها حديقة، مسؤولين عنهم
في ذمتكم ترى هالأطفال ! كونوا قدوة “حسنة” لأطفالكم

الله يحفظنا واياكم من كل مكروه
كونوا بخير